საყოველთაო ჯანდაცვის სისტემაში არსებულ ხარვეზებზე ჯანდაცვის მინისტრის შემდეგ, ჯანდაცვის კომიტეტის თავმჯდომარის პირველი მოადგილე საუბრობს.
დიმიტრი ხუნდაძის განმარტებით, სამინისტრო წელიწად-ნახევრის განმავლობაში სხვადასხვა კლინიკებში მონიტორინგს ატარებდა, ხარვეზების აღმოჩენის შემთხვევაში კი მათ რეკომენდაციებს აძლევდა. თუმცა, როგორც ხუნდაძე აცხადებს, კონკრეტულ სამედიცინო დაწესებულებებს შენიშვნები ამ დრომდე არ გაუთვალისწინებიათ. მისივე თქმით, თუ ამ კლინიკებში პრობლემები დროულად არ მოგვარდება, ისინი სახელმწიფო პროგრამას გამოეთიშებიან.
სამედიცინო დაწესებულებები გუშინ ჯანდაცვის მინისტრმა საჯაროდ გააკრიტიკა და განაცხადა, რომ საყოველთაო ჯანდაცვის პროგრამაში ჩართული კლინიკებიდან, რამდენიმე დაწესებულებაში ფინანსების დიდი ნაწილი პაციენტების და მედპერსონალის ნაცვლად მენეჯმენტის ხელფასებზე იხარჯება. ცნობილია, რომ ე.წ. შავ სიაში 12-მდე საავადმყოფო მოხვდა.