დღეს გამთენიისას "ენ-ბი-ეის" "ყველა ვარსკვლავის" ძირითადი ხუთეულების საბოლოო შედეგები გამოქვეყნდა. სამწუხაროდ, არ გამართლდა ქათველ გულშემატკივართა მოლოდინი და ზაზა ფაჩულია დასავლეთ კონფერენციის ძირითად ხუთეულში ვერ მოხვდა.

შეგახსენებთ, რომ პირველ ეტაპზე, ინტერნეტგამოკითხვის შემდეგ, ქართველი კალათბურთელი მეორე ადგილზე იყო, თუმცა ახალი წესების თანახმად, ეს მხოლოდ 50 პროცენტს შეადგენდა. დარჩენილი 50 პროცენტი კი, გუნდების მთავარ მწვრთნელებზე და თავად კალათბურთელებზე მოდიოდა.

მოთამაშეებმა ჩვენი ნაკრების კაპიტანი მე-12 ადგილზე გაიყვანეს, ხოლო მწვრთნელებმა -მეათეზე.

სამივე გამოკითხვის საშუალო შედეგებით, ზაზა მეექვსე აღმოჩნდა და ხუთეულში ვერ მოხვდა. "ოლ სტარის" მონაწილე დანარჩენ 7-7 მოთამაშეს კი უკვე, კონფერენციის გუნდების თავკაცები თავად დაასახელებენ.

ახლა ყველაფერი სტივ კერზე იქნება დამოკიდებული, მისცემს თუ არა ფაჩულიას შანსს, რომელიც წელს დასავლეთ კონფერენციის გუნდის მწვრთნელი იქნება.

არჩეულ ხუთეულებს რაც შეეხება. აღმოსავლეთ კონფერენციის სასტარტოში ითამაშებენ: ლებრონ ჯეიმსი, ჯიმი ბატლერი, დემარ დე როუზაინი, კაირი ირვინგი და იანის ანტეტუკონმპო.

დასავლეთის ძირითადში იქნებიან: სტეფ კარი, კევინ დიურანტი, ჯეიმს ჰარდენი, კავაი ლეონარდი და ენტონი დევისი.

ნაციონალური საკალათბურთო ასოციაციის "ყველა ვარსკვლავის" შეხვედრა 19 თებერვალს ნიუ ორლეანში ჩატარდება.