„ნაციონალურ მოძრაობას“, შესაძლოა, ვანო მერაბიშვილიც გაემიჯნოს. პატიმრობაში მყოფი შინაგან საქმეთა ყოფილი მინისტრი პარტიულ თანამდებობაზე უარს ამბობს. ექსმაღალჩინოსანი პარტიის გენერალური მდივანი აღარ იქნება. საუბარია პოსტზე, რომელსაც მერაბიშვილი ხელისუფლების შეცვლის შემდეგ იკავებდა და რომელიც მიხეილ სააკაშვილის თანამოაზრეებმა სამი დღის წინ გამართულ ყრილობაზე ხელუხლებლად დატოვეს.
პატიმრის გადაწყვეტილება ნიკა მელიამ გაახმოვანა, რომელიც ექსმინისტრს, დღეს, საკანში სამი საათის განმავლობაში ესაუბრებოდა.
ამ დრომდე ინტრიგად რჩება, ნიშნავს თუ არა გენერალურ მდივნობაზე უარი ე.წ ბოკერია-უგულავას გუნდში გადასვლას. პარტიაში არსებულ დაპირისპირებაზე და ლიდერების ერთი ნაწილის წასვლაზე ვანო მერაბიშვილს საკუთარი პოზიცია საჯაროდ ჯერ არ დაუფიქსირებია.