საქართველოს ფუტსალის ნაკრებმა, ევროპის ჩემპიონატის პირველი საკვალიფიკაციო ეტაპი დამაჯერებელი გამარჯვებით დაიწყო.
ავთანდილ ასათიანის გუნდმა, გუშინ, ისრაელის ეროვნული გუნდი 3:0 დაამარცხა. თბილისის ოლიმპიურ სასახლეში გამართული მატჩი, მასპინძელთა სრული უპირატესობით წარიმართა. პირველი ტაიმის ბოლო წამებზე ანგარიში შოთა თოფურიამ გახსნა. მეორე ნახევარში, ქართველმა ფეხბურთელებმა კიდევ ორჯერ აიღეს მეტოქის კარი. ჯერ მაისაიამ გაიტანა, ხოლო თამაშს საბოლოო წერტილი, ჩვენი გუნდის ვეტერანმა გოლკიპერმა, ზვიად კუპატაძემ დაუსვა, რომელმაც საკუთარი კარიდან ზუსტი დარტყმით გამოიჩინა თავი.
გუშინვე, ჩვენს ჯგუფში, შვეიცარიამ შოტლანდია, ანგარიშით 6:2 დაამარცხა. ამ წუთებში, შვეიცერიელები ისრაელს ხვდებიან. ხოლო 20 საათზე, საქართველო-შოტლანდიას დაუპირისპირდება. ამ შეხვედრის პირდაპირ ტელერეპორტაჟს, საზოგადოებრივი მაუწყებლის მეორე არხი შემოგთავაზებთ.
შეგახსენებთ, რომ მომდევნო ეტაპზე, მხოლოდ ჯგუფის გამარჯვებული ერთი გუნდი გადის.