ამერიკის შეერთებული შტატების ელჩი საქართველოში იან კელი ხურჩა-ნაბაკევის შემდეგ ორსანტია-ოტობაიას ე.წ. საზღვართან მივიდა და არსებულ ვითარებას ადგილზე გაეცნო. კელის განცხადებით, ამერიკის შეერთებული შტატები შეშფოთებულია აფხაზეთის დე ფაქტო მთავრობის გადაწყვეტილებით, ე.წ. გამშვები პუნქტების დახურვის თაობაზე. მისი თქმით, ეს გადაწყვეტილება შეზღუდავს მოსახლეობის გადაადგილების უფლებას.
იან კელის თქმით, ამერიკის შეერთებული შტატები საკითხზე როგორც გაერო-ში, ისე ეუთო-სა და ჟენევის მოლაპარაკებებზე აუცილებლად განიხილავს.
შეგახსენებთ, უახლოეს პერიოდში ნაბაკევი-ხურჩის და ოტობაია-ორსანტიას ეწ გადასასვლელების დაკეტვა იგეგმება. გუშინ, გალის რაიონის სოფელ ნაბაკევში ადგილობრივმა მოსახლეობამ საპროტესტო აქციაც გამართა, თუმცა აფხაზური მხარე გადაწყვეტილების შეცვლას არ გეგმავს.
გალის რაიონის დაბალი ზონის მოსახლეობას ზუგდიდში მოსახვედრად დამატებით 30 კმ-ზე მეტის გავლა მოუწევს.