დიღმის მასივში მდებარე ანდრო ჟორდანიას სახელობის, თბილისის "დინამოს" საწვრთნელი ბაზის მიმდებარე ტერიტორიაზე, მრავალფუნქციური საცხოვრებელი კომპლექსის მშენებლობა კვლავ მიმდინარეობს.
თბილისის "დინამოს" წარმომადგენლებმა დღეს კიდევ ერთხელ მიმართეს დედაქალაქის მერიას თხოვნით, რომ სამშენებლო კომპანიას, რომელიც აღნიშნულ მრავალსართულიან კომპლექსს აშენებს, ალტერნატიული ფართი გამოუყოს.
თბილისის "დინამოს" პრეზიდენტის მრჩეველი ლევან სალუქვაძე აცხადებს, რომ პირველ ეტაპზე საუბარი იყო სამსართულიანი ნაგებობის მშენებლობაზე, თუმცა როგორც შემდეგ გაირკვა, ტერიტორიაზე 18-სართულიანი საცხოვრებელი კორპუსი აშენდება.
"დინამოს" წარმომადგენლები ამბობენ, რომ კომპლექსის აშენების შემთხვევაში, საწვრთნელი ბაზა რეალურ ფუნქციას დაკარგავს და სპორტსმენები ნორმალურ პირობებში ვარჯიშს ვერ შეძლებენ.
დიღმის მასივში მდებარე ანდრო ჟორდანიას სახელობის დინამოს ბაზაზე სხვადასხვა დროს,არაერთი ლეგენდარული ფეხბურთელი აღიზარდა.