დღეს ნინოობაა. ქართული მართლმადიდებელი ეკლესია იმ წმინდანს იხსენებს, რომელიც საქართველოში მე-4 საუკუნეში კაბადოკიიდან შემოვიდა და წარმართულ ქვეყანაში ქრისტიანობა გაავრცელა.
წმიდა ნინოს ხსენებას საქართველოს ეკლესია წელიწადში ორჯერ დღესასწაულობს: 1 ივნისს მისი საქართველოში შემოსვლა აღინიშნება, ხოლო 27 იანვარს – გარდაცვალება.
კათოლიკოს-პატრიარქმა სადღესასწაულო ლიტურგია სიონის ტაძარში აღავლინა. დღესასწაულთან დაკავშირებით, ტაძრის ცენტრში წმინდა ნინოს ჯვარი გამოაბრძანეს და მისი მოლოცვა მრევლს მთელი დღის განმავლობაში შეეძლება.
საზეიმო წირვას პრემიერმინისტრი, დედაქალაქის მერი და საკრებულოს თავმჯდომარეც დაესწრნენ. ლიტურგიის შემდეგ ილია მეორემ მრევლს დღესასწაული მიულოცა და ადამიანის დანიშნულების შესახებ იქადაგა.
პატრიარქმა მინი ფეხბურთის ეროვნული ნაკრებიც დალოცა და მათ საპასუხიმგებლო შეხვედრაში გამარჯვება უსურვა.