უამინდობის გამო, საავტომობილო გზებზე მოძრაობის სპეციალური რეჟიმებია დაწესებული. ფარავანი -ნინოწმინდის და ახალციხე-ნინოწმინდის საავტომობილო გზის მონაკვეთზე ტრანსპორტის მოძრაობა დასაშვებია მოცურების საწინააღმდეგო ჯაჭვების გამოყენებით.
ინტენსიური თოვის გამო, ნაქერალას უღელტეხილზე აკრძალულია მისაბმელიანი, ნახევრადმისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა, ხოლო დანარჩენი სახის ტრანსპორტის გადაადგილება თავისუფალია.
იგივე რეჟიმი მოქმედებს გომბორი - თელავი - ვაზიანის საავტომობილო გზაზე, სადაც მთელი ღამის განმავლობაში თოვდა.
გაწმენდითი სამუშაოები მიმდინარეობს თბილისშიც. დასუფთავების სამსახურმა ტექნიკური მარილის დაყრა დილიდან დაიწყო.
საავტომობილო გზების დეპარტამენტი მოსახლეობას მოუწოდებს, დაემორჩილონ დაწესებულ რეჟიმებს.
ყინვასა და თოვლს ქვეყნის მთელ ტერიტორიაზე სინოპტიკოსები კიდევ რამდენიმე დღის განმავლობაში ვარაუდობენ.