„რატომ ჩავარდა სია“, – წერილს ამ სათაურით ევა გოცირიძე აქვეყნებს და სტრასბურგის სასამართლოს მხრიდან საქართველოს მოსამართლეობის კანდიდატთა სიის უკან დაბრუნების შესახებ პირველ კომენტარს აკეთებს.

იუსტიციის უმაღლესი საბჭოს წევრი არ გამორიცხავს, რომ სტრასბურგის სასამართლოში წარდგენილი მოსამართლეობის კანდიდატთა სიის წინააღმდეგ გარკვეული პირების მუშაობა, სტრასბურგის სასამართლოში მერაბიშვილის საქმის განხილვას უკავშირდებოდეს. გოცირიძის განმარტებით, მისი კანდიდატურის წინააღმდეგ განხორციელდა ძალთა არნახული მობილიზაცია მთელი მესამე სექტორისა და „ნაციონალური მოძრაობის“ მხრიდან, მათ შორის, არასამთავრობო ორგანიზაციათა კოალიციის, ადვოკატთა ასოციაციის თავმჯდომარის, ევროსაბჭოში საქართველოს ყოფილი წარმომადგენლისა და სახალხო დამცველის მონაწილეობით.

წერილის ავტორის ინფორმაციით, შედეგად მივიღეთ ის, რომ სიის ჩავარდნის გამო ამჟამინდელ მოსამართლეს გაუხანგრძლივდა ვადა და მერაბიშვილის საქმეს სტრასბურგში ადეიშვილის მოადგილე განიხილავს.

ევა გოცირიძის წერილს სააგენტო „ინტერპრესნიუსი“ ავრცელებს.