აშშ-სა და რუსეთის პრეზიდენტებმა ისაუბრეს ორ ქვეყანას შორის კოორდინირებული მუშაობის მნიშვნელობაზე ISIS-ისა და სხვა ტერორისტული ორგანიზაციების წინააღმდეგ საბრძოლველად, ამის შესახებ ინფორმაციას კრემლის პრესსამსახური ავრცელებს.
ეს დონალდ ტრამპის ინაუგურაციის შემდეგ პუტინთან პირველი კომუნიკაცია იყო. სატელეფონო საუბარი 50 წუთს გაგრძელდა.
კრემლის პრესსამსახურის ინფორმაციით, ტრამპმა და პუტინმა განიხილეს ისეთი საკითხები, როგორებიცაა ახლო აღმოსავლეთში არსებული ვითარება და უკრაინის კრიზისი.
კრემლის პრესსამსახურის ცნობით, აშშ-სა და რუსეთის პრეზიდენტები შეთანხმდნენ, რომ მათი გუნდის წევრებმა დაიწყონ მუშაობა მათი პირისპირ შეხვედრის შესაძლო თარიღისა და ადგილის მოსამზადებლად. საუბრის დროს მხარეებმა გამოთქვეს დიდი სურვილი, რომ ხშირი პირადი კონტაქტი შეინარჩუნონ.
ორი ქვეყნის პრეზიდენტებს შორის კომუნიკაცია დადებითად შეფასდა რუსი მაღალჩინოსნების მხრიდან, თუმცა ევროპელმა ლიდერებმა დონალდ ტრამპი გააკრიტიკეს და ვარაუდი გამოთქვეს, რომ ტრამპი მთავარ შეთანხმებებს დაარღვევს, მათ შორის რუსეთის წინააღმდეგ სანქციების დაწესებას ყირიმის ანექსიის გამო.
თეთრი სახლის პრესსპიკერის შონ სპაისერმა გამოაქვეყნა სურათი, რომელშიც ჩანს, რომ ოვალურ კაბინეტში დონალდ ტრამპი რუსეთის პრეზიდენტს აშშ-ის ვიცე-პრეზიდენტის მაიკლ პენსის, ეროვნული უსაფრთხოების საკითხებში თანაშემწის მაიკლ ფლინის, თეთრი სახლის აპარატის ხელმძღვანელის რაინს პრიბუსისა და პოლიტიკური მრჩეველის სტივენ ბენონის თანდასწრებით ესაუბრებოდა.