ე.წ. რიტუალური მკვლელობის საქმის არსებითი განხილვა თბილისის საქალაქო სასამართლოში დღეს დაიწყო.
საქმის განხილვა დახურულ რეჟიმში მიმდინარეობს. პროცესის დახურვა ბრალდების მხარემ მოითხოვა, რასაც დაკავებული ირმა ყოჩიაშვილის ადვოკატიც დაეთანხმა.
პროკურორის განმარტებით, სისხლის სამართლის საქმეში ფიგურირებს არასრულწლოვანი, მტკიცებულებების გამოკვლევის ეტაპზე კი, პროკურორის თქმით, შესაძლებელია დაირღვეს არასრულწლოვანთა მართლმსაჯულების კოდექსი. ამასთან, პროკურორმა სხდომის დახურვის ერთ-ერთ არგუმენტად დაზარალებულის უფლებამონაცვლის, ლუბა ყოჩიაშვილის მეუღლის ინტერესი დაასახელა.
რაც შეეხება საქმეზე კიდევ ერთი ბრალდებულის, ბექა შენგელიას ადვოკატის პოზიციას, ის აღნიშნულ შუამდგომლობას არ დაეთანხმა. მისი თქმით, საქმეზე საზოგადოების დიდი ინტერესია და პროცესების განხილვა საჯარო უნდა იყოს.
საქმის არსებითი განხილვა ბრალდების მხარის შესავალი სიტყვით მიმდინარეობს.