საქართველოს მთავრობა გავრცელებულ ინფორმაციას ეხმაურება, რომლის მიხედვითაც, კონსტიტუციაში გადასახადებთან დაკავშირებით ცვლილებები იგეგმება. მთავრობის ადმინისტრაციის განცხადებით, ინფორმაცია სიმართლეს არ შეესაბამება.
„გვსურს, გამოვეხმაუროთ გავრცელებულ ინფორმაციას, თითქოს, კონსტიტუციაში, გადასახადებთან დაკავშირებით, რაიმე სახის ცვლილების ინიცირება იგეგმება. საქართველოს მთავრობა არ აპირებს არანაირი ცვლილებების ინიცირებას საქართველოს კონსტიტუციაში, რომელიც უკავშირდება ახალი სახის საერთო-სახელმწიფოებრივი გადასახადის შემოღებას, ან, არსებული გადასახადის განაკვეთის ზრდისთვის, რეფერენდუმის გაუქმებას“, - ვკითხულობთ მთავრობის ადმინისტრაციის განცხადებაში.
მთავრობის ადმინისტრაციის განცხადებით, ერთადერთი ცვლილება შეიძლება შეეხოს ჩანაწერს, საპენსიო შენატანებთან დაკავშირებით, რათა ის არ ჩაითვალოს ახალ გადასახადად.