დიდი ბრიტანეთის თემთა პალატამ პირველი მოსმენით დაამტკიცა ლისაბონის 50-ე მუხლის ამოქმედების საკითხი, რომელიც ევროკავშირიდან ქვეყნის გამოსვლისთვის ოფიციალური განაცხადის გაკეთებას ითვალისწინებს.

ორდღიანი დებატების შემდეგ კანონპროექტს 498 დეპუტატმა 114-ის წინააღმდეგ დაუჭირა მხარი. დოკუმენტის წინააღმდეგ ხმა შოტლანდიის „ნაციონალურმა პარტიამ“, „ლიბერალ-დემოკრატებმა“ და „ლეიბორისტული პარტიის“ წარმომადგენელთა ნაწილმა მისცა.

კანონპროექტი პარლამენტს განსახილველად უზენაესი სასამართლოს დადგენილების საფუძველზე გადაეგზავნა, რომელმაც დაადასტურა, რომ ბრიუსელთან მოლაპარაკების დაწყებისთვის, მთავრობას პარლამენტის ნებართვა ესაჭიროება.