ხვალიდან, თბილისის ოლიმპიურ სასახლეში, საქართველოს ჩოგბურთელთა ნაკრები, დევისის თასის ევროაფრიკული ზონის მეორე ჯგუფის შეხვედრებში, ფინეთის ნაკრებს დაუპირისპირდება.
გამართული წილისყრის შედეგად, პირველ მატჩში, ჩვენი ნაკრების ლიდერი, ნიკოლოზ ბასილაშვილი, 20 წლის ეერო ვასას შეხვდება. ამ თამაშის დასრულებისთანავე, კორტზე გიორგი ცივაძე და პატრიკ ნიკლას სალმინენი გავლენ. შაბათს წყვილთა თანრიგის შეხვედრა შედგება. ასპარეზობა კვირას დასრულდება.
აღსანიშნავია, რომ ფინელები ვეტერანი ჩოგბურთელის იარკო ნიიმინენის გარეშე იასპარეზებენ. მათ შემადგენლობაში ასევე არ იქნება ავსტრალიის ღია პირველობის გამარჯვებული წყვილთა თანრიგში ჰენრი კონტინენი.
საქართველო-ფინეთის მატჩების პირდეპირ ტელერეპორტაჟს სამი დღის განმავლობაში საზოგადოებრივი მაუწყებლის მეორე არხი და ჩვენი ფეისბუქ-გვერდი შემოგთავაზებთ