ბიზნესმენ ბესო ხარძიანის მკვლელობის საქმეზე დღეს ბრალდების მხარემ 2 მოწმე დაკითხა. ერთ-ერთი მოწმის მტკიცებით, იმ დღეს როდესაც ხარძიანი მოკლეს, მის საცხოვრებელ სახლთან მოპედით მოძრავი პირი შენიშნა, რომელსაც ჩაფხუტი ეფარა, შესაბამისად, მისი სახის ამოცნობა ვერ შეძლო.
სხდომაზე ასევე დაიკითხა გამომძიებელი, რომელიც საქმეზე მუშაობდა. გამომძიებლის განცხადებით, მის მიერ მოპოვებული მტკიცებულებების საფუძველზე დგინდება, რომ მკვლელობა სწორედ ბრალდებულებმა ფარიდ გურბანოვმა და ალექსანდრე დოევმა ჩაიდინეს.
დაცვის მხარე კი აცხადებს, რომ მოწმეებმა სასამართლოს მნიშვნელოვანი ჩვენებები ვერ მისცეს და აღნიშნული ჩვენებით მისი დაცვის ქვეშ მყოფების ბრალეულობა არ დასტურდება.
ბესო ხარძიანი 2015 წლის მარტში საკუთარ საცხოვრებელ სახლთან ცეცხლსასროლი იარაღით მიყენებული ჭრილობებისგან გარდაიცვალა. საქმეზე უცხო ქვეყნის 2 მოქალაქე - ალექსანდრე დოევი და ფარიდ გურბანოვი არიან ბრალდებულები, თუმცა მათ საქართველოს საზღვარი მკვლელობიდან რამდენიმე საათში დატოვეს და ამ დრომდე იმალებიან.