სიეტლის ფედერალურმა მოსამართლემ შეერთებული შტატების პრეზიდენტ დონალდ ტრამპის საიმიგრაციო განკარგულების მოქმედება მთელი ქვეყნის მასშტაბით დროებით შეაჩერა.

გადაწყვეტილება ცოტა ხნის წინ გამოცხადდა და ტრამპის ადმინისტრაცია მას ჯერ არ გამოხმაურებია.

„არავინ დგას კანონზე მაღლა, მათ შორის არც პრეზიდენტი“, - განაცხადა ვაშინგტონის გენერალურმა პროკურორმა მოსამართლის გადაწყვეტილების კომენტირებისას.

პრეზიდენტის განკარგულების წინააღმდეგ სარჩელი ვაშინგტონისა და მინესოტის შტატებმა შეიტანეს.

დონალდ ტრამპის მიერ გამოცემული განკარგულება უმეტესად მუსლიმებით დასახლებული შვიდი ქვეყნის მოქალაქეებისთვის აშშ-ის ტერიტორიაზე შესვლის 90 დღით, ლტოლვილთა დახმარების პროგრამის 120 დღით და სირიელი ლტოლვილებისთვის აშშ-ში შესვლის უფლების გაურკვეველი ვადით შეჩერებას გულისხმობს.

ტრამპის გადაწყვეტილებას მასობრივი საპროტესტო აქციები მოჰყვა.

აშშ-ის სახელმწიფო დეპარტამენტის ცნობით, პრეზიდენტის განკარგულების შემდეგ, ვიზა 60 000-მდე პირს გაუუქმდა.

წყარო: CNN, USA Today

ფოტო: AP