ბათუმის ბულვარში წვრილმანი ხულიგნობისთვის დაკავებული შვიდი ახალგაზრდას ახლობლები სამართალდამცველებს დაკავებულების მიმართ ფიზიკურ ძალადობაში ადანაშაულებენ, ამის შესახებ „მოამბის" ჟურნალისტი ადგილიდან იუწყება.
შვიდი პირი ბათუმში გუშინ დააკავეს. როგორც მათი ახლობლები ამბობენ, პოლიციამ დაკავების მომენტში ახალგაზრდებს ფიზიკური და სიტყვიერი შეურაცხყოფა მიაყენა, რის გამოც შესაბამისი განცხადებით მათ გენერალურ ინსპექციას უკვე მიმართეს.
ბრალდებულები წინასწარი დაკავების იზოლატორში არიან გადაყვანილი. სასამართლო პროცესი ბათუმის საქალაქო სასამართლოში დღეს გაიმართება.
შინაგან საქმეთა სამინისტროში ძალადობის ფაქტს არ ადასტურებენ და განმარტავენ, რომ დაკავების მომენტში ახალგაზრდებმა პოლიციელს წინააღმდეგობა გაუწიეს. უწყების ინფორმაციით შვიდივე პირი კანონის სრული დაცვით დააკავეს.
ახალგაზრდები ადმინისტრაციული კოდექსის ორი მუხლით არიან დაკავებული, რაც წვრილმან ხულიგნობასა და პოლიციისადმი დაუმორჩილებლობას გულისხმობს.