ევროპარლამენტში ვიზალიბერალიზაციის საკითხთან დაკავშირებით ჩატარებული კენჭისყრის მეორე დღეს, კრემლის ბრძანებით, ოკუპირებულ ცხინვალში ნომერ მეოთხე რუსულ ბაზაზე სოფ. ძარწემში სამხედრო მზადყოფნის მოულოდნელი შემოწმება დაიწყო.
სწავლებაში 500 სამხედრო მოსამსახურე და 100 ერთეული ტექნიკა იყო ჩართული. ინფორმაციას რუსეთის ცენტრალური ტელეარხი „რასია 24” ავრცელებს. ადგილზე ჟურნალისტიც იმყოფებოდა, თუმცა ასეთი მასშტაბური წვრთნა და მასშტაბური გაშუქება რუსული ცენტრალური ტელევიზიის ეთერით საკმაოდ იშვიათია.
ადგილზე რუსეთის სამხედრო ძალების სამხრეთ ოლქის მეთაურიც იმყოფებოდა. მისი განცხადებით, სწორედ ამ ბაზაზე დისლოცირებული რუსული საჯარისო დანაყოფები ახორციელებენ რუსეთის სამხრეთით საზღვრების დაცვას, თუმცა რატომ გახდა მოულოდნელი მასშტაბური შემოწმების ჩატარება აუცილებელი, მას არ დაუკონკრეტებია.
ოკუპირებული ცხინვალის რეგიონში, რუსული მეოთხე ბაზა შეიარაღებული ძალების ერთ-ერთი უმსხვილესი ბაზაა, სადაც 3700 სამხედრო მსახურობს.