საქართველოს ნაკრებმა დევისის თასზე ევროაფრიკული ზონის მეორე ჯგუფში ფინეთის ნაკრები დაამარცხა.

ბოლო გადამწყვეტი შეხვედრა, რომელშიც გიორგი ცივაძემ ფინელთა პირველი ნომერს სძლია, 4 საათი გაგრძელდა.

სამდღიანი ტურნირის დეტალები ნახეთ ლევან ღუდუშაურის რეპორტაჟში.



დევისის თასის 2017 წლის გათამაშების ევრო-აფრიკული ზონის მეორე ჯგუფში, საქართველოს ნაკრებმა ფინეთის დამარცხება შეძლო და გათამაშების შემდეგ ეტაპზე გავიდა.

პირველ დღეს, 3 თებერვალს ბასილაშვილმა ვასა დაამარცხა, იმავე დღეს ცივაძემ დათმო თავისი შეხვედრა ჰელიოვაარასთან, შაბათს წყვილთა თანრიგში ბასილაშვილი-ცივაძის წყვილი ჰელიოვაარა-ნიკლას-სალმინენის წვილთან დამარცხდა და ორი სათამაშო დღის შემდეგ ანგარიში 1:2 გახდა ფინელთა სასარგებლოდ.

განსაკუთრებულად დრამატული და სანახაობრივი დაპირისპირების მესამე დღე გახდა - პირველ შეხვედრაში ბასილაშვილმა რუუსოვორი სამ სეტში დაამარცხა, გადამწყვეტი კი ცივაძის და ნიკლას-სალმინენის საოცრად დაძაბული მატჩი გამოდგა.

4-საათიანი ემოციური მაჩის ბედი არაერთხელ შეიცვალა, ორივე ჩოგბურთელი ახლოს იყო გამარჯვებასთან, მაგრამ საბოლოოდ ცივაძემ შეძლო თითქმის წაგებული მატჩის შემოტრიალება და ტაი-ბრეიქში მოუგო ფინელს.

ამ გამარჯვებით საქართველოს ნაკრები შემდეგ ეტაპზე გადავიდა, სადაც მისი მეტოქე ლიტვის ნაკრები იქნება, მატჩები 2017 წლის 7-9 აპრილს გაიმართება.