ადამიანის უფლებების სწავლების და მონიტორინგის ცენტრი განათლების სამინისტროს მიმართავს და ითხოვს, მოხეს სკოლაში რელიგიური ნიშნით შესაძლო შევიწროების ფაქტები შეისწავლოს.
ორგანიზაცია მოსწავლეების განმარტებების საფუძველზე ვარაუდობს, რომ სკოლაში დისკრიმინაციის ფაქტები ახალ სასწავლო სემესტრშიც გრძელდება.
მეთორმეტე კლასელები ამბობენ, რომ 2016 წლის დეკემბერში გამოხატული პროტესტის გამო დირექტორი საკუთარ უფლებამოსილებას მათ დასასჯელად იყენებს. კერძოდ, მასწავლებლებს, რომლებიც მათ სავალდებულო გაკვეთილის დამთავრების შემდეგ სკოლის შენობაში უსასყიდლოდ ამზადებდნენ ეროვნული გამოცდებისათვის, ასეთი საქმიანობა აუკრძალა.
ოქროს მედლის რამდენიმე კანდიდატ მოსწავლეს დირექტორმა განუცხადა, რომ სკოლის მედლით დასრულების საკითხი ეჭვქვეშ დგას. ასევე, სხვა სოფლებში მცხოვრებ მოსწავლეებს აღარ აძლევს საშუალებას, სკოლის ავტობუსს თბილ საკლასო ოთახში დაელოდონ.
შეგახსენებთ, 2016 წლის 22 დეკემბერს მუსლიმ გოგონას დირექტორმა ნატია რეხვიაშვილმა სკოლაში თავსაბურავით მისვლა აუკრძალა. გოგონასადმი სოლიდარობის ნიშნად მუსლიმმა მოსწავლეებმა, სკოლის წინ რამდენიმე საპროტესტო აქცია გამართეს.
„ი-ემ-სი“ განათლების სამინისტროს მოუწოდებს, დროულად შეისწავლოს სკოლაში არსებული სიტუაცია და სპეციალური პოზიტიური ღონისძიებები გაატაროს.