აშშ-ს პრეზიდენტმა დონალდ ტრამპმა განაცხადა, რომ მისი ადმინისტრაცია აუცილებლად მოიგებს სამართლებრივ ბრძოლას საიმიგრაციო პოლიტიკასთან დაკავშირებულ საქმეზე.
როგორც მან ჟურნალისტებთან საუბრისას აღნიშნა, საუბარია ახალი განკარგულების გამოცემაზე, ვინაიდან ძველი საქმე ამჟამად სასამართლოში განიხილება.
აშშ-ს პრეზიდენტის მიერ ხელმოწერილი დოკუმენტის თანახმად, შვიდი მუსლიმი სახელმწიფოს მოქალაქეებს ამერიკაში შესვლა 90 დღის განმავლობაში აეკრძალათ. პრეზიდენტის განკარგულების მოქმედება სიეტლის მოსამართლემ მთელი ქვეყნის მასშტაბით შეაჩერა. ტრამპის ადმინისტრაციამ ეს გადაწყვეტილება სააპელაციო სასამართლოში გაასაჩივრა, თუმცა სიეტლის მოსამართლის გადაწყვეტილება ზედა ინსტანციამაც ძალაში დატოვა.
დონალდ ტრამპს შეუძლია საჩივარი უზენაეს სასამართლოშიც შეიტანოს, თუმცა ამერიკულ მედიაში გავრცელებული ინფორმაციით, ამ ეტაპზე, გასაჩივრება არ იგეგმება
„ჩვენ ამ ბრძოლას მოვიგებთ. სამწუხაროა მხოლოდ ის ფაქტი, რომ ამას დრო მიაქვს. ბრძოლას მოვიგებთ. თუმცა ჩვენ სხვა არჩევანიც გვაქვს - გამოიცეს ახალი განკარგულება“ - განაცხადა დონალდ ტრამპმა.
ამ ეტაპზე, უცნობია, რა შინაარსის იქნება პრეზიდენტის ახალი განკარგულება. როგორც დონალდ ტრამპმა აღნიშნა, ის ბრძანება „ცოტა განსხვავებული“ იქნება.
სააპელაციო სასამართლოს განცხადებით, პრეზიდენტის ადმინისტრაციამ ვერ წარმოადგინა იმის მტკიცებულება, რომ საიმიგრაციო განკარგულება ამერიკას ტერორიზმის საფრთხისგან დაიცავს.