რა ცვლილებები იგეგმება სასჯელაღსრულების სისტემაში?! ინიციატივების და წინადადების შესახებ საკონსულტაციო საბჭოს მორიგ სხდომაზე იმსჯელეს.
ერთ-ერთი წინადადება მსჯავრდებულ დედებს ეხება. მოქმედი კანონმდებლობით, მათთან ერთად ბავშვები მხოლოდ 3 წლის ასაკამდე რჩებიან.
ახალი ინიციატივის მიხედვით კი დედას, შვილის საპატიმროდან გაყვანის შემდეგ, ერთი წლის განმავლობაში, საშუალება ექნება შაბათ-კვირას საპატიმრო დატოვოს და ეს დრო ბავშვთან ერთად გაატაროს.
ცვლილებების ფარგლებში ასევე გათვალისწინებულია მსჯავრდებულთათვის უმაღლესი განათლების მიღების უფლება და შინაპატიმრობის შემოღება სრულწლოვანი პატიმრებისთვის.
მინისტრის სათათბირო ორგანო სასჯელაღსრულების სისტემაში მიმდინარე პროცესების გამჭირვალობის და საზოგადოების მაქსიმალური ჩართულობის უზრუნველსაყოფად შეიქმნა.
საბჭოში ადგილობრივი და საერთაშორისო არასამთავრობო ორგანიზაციის 42 წარმომადგენელი და ექსპერტი შედის.
საკონსულტაციო საბჭო 3 თვეში ერთხელ იკრიბება.