ამ წუთებში ბათუმის შაჰინის სახელობის სკოლა-ლიცეუმის მოსწავლეებმა და მათმა მშობლებმა, რომლებიც აჭარის მთავრობასთან საპროტესტო აქციას მართავენ, ქუჩა გადაკეტეს.
„შაჰინი ჩვენია, მოგვეცით სწავლის უფლება“, - ამ შინაარსის ტრანსპარანტებით მივიდნენ აქციის მონაწილეები აჭარის მთავრობის შენობასთან. ისინი მთავრობისგან დახმარებას მოითხოვენ, რათა სწავლის პროცესი სასწავლო წლის შუა პერიოდში არ შეწყდეს.
აქციის მონაწილეების განცხადებით, დღეს დილით სკოლა-ლიცეუმში მისულ მოსწავლეებს სკოლის დირექტორმა გამოუცხადა, რომ სასწავლო პროცესს ვეღარ განაახლებდა, რის შემდეგაც აქცია ლიცეუმთან დაიწყო და აჭარის მთავრობასთან გადმოინაცვლა.
შეგახსენებთ, განათლების ხარისხის ეროვნულმა ცენტრმა სასწავლო დაწესებულებისთვის ავტორიზაციის გაუქმების გადაწყვეტილება რამდენიმე დღის წინ მიიღო, რასაც პედაგოგებისა და მშობლების პროტესტი მოჰყვა.