საზოგადოებრივი მაუწყებლის გენერალური დირექტორის ვასილ მაღლაფერიძის ინფორმაციით, სამ წელიწადში „მოამბეს“ ყველაზე კარგი ნიუსრუმი ექნება საქართველოში.
როგორც მაღლაფერიძემ „მოამბესთან“ საუბრისას აღნიშნა, ნიუსრუმის გაძლიერების იდეის მხარდაჭერას ელოდება იმ ადამიანებისგან, ვისაც სურს, თავის პროფესიას გაჰყვეს.
მაღლაფერიძის თქმით, ატესტაცია „მოამბის“ თანამშრომლებისთვის პროფესიული განვითარების კარგი შესაძლებლობა იქნება.
„ნიუსრუმის გაძლიერების იდეის მხარდაჭერას ველოდები იმ ადამიანებისგან, ვისაც თავის პროფესიაში უნდა დარჩენა და უნდა, რომ ამ პროფესიას გაყვეს.
ნიუსრუმის კონცეფცია არის ერთ-ერთი ყველაზე თანამედროვე და კარგად მოფიქრებული. კონცეფციის მომზადებაში ასევე ჩართული იყვნენ უცხოელი კონსულტანტები, მაგრამ არანაირი პლატფორმა და სივრცე ამის განსახორციელებლად დღეს არ არის.
სწორედ იმიტომ ვგეგმავთ იმ შენობაში ახალი ნიუსრუმის მთლიანად განთავსებას. ვგეგმავთ, რომ 2018 წლის პირველ ნახევარში უნდა მოვრჩეთ ამას.
ატესტაციის პროცესმა არავინ უნდა დააფრთხოს, მაგრამ დარწმუნებული ვარ, რასაც ვაკვირდები, „მოამბის“ შემადგენლობის დიდი ნაწილი არამარტო გაუძლებს, არამედ, პირიქით, უფრო დიდ ასპარეზს ჰპოვებს და მათი პროფესიული განვითარებისთვის ეს იქნება კარგი შესაძლებლობა.
იქნებიან ისეთები, რომლებიც ვერ გაუძლებენ, ასეთი სიტუაცია ყველგან არის. არ უნდა გადავაყოლოთ ამ მტკივნეულ პროცესს ის დადებითი, რაც არის.
ჩვენ ახლა უკან დასახევი გზა არ გვაქვს. ზუსტად ვიცი, რომ სამ წელიწადში ეს იქნება ერთ-ერთი ყველაზე მაგარი ნიუსრუმი საქართველოში. მგონია, რომ შეიძლება ყველაზე მაგარიც იყოს, გავა სამი წელი და ამას დავინახავთ“,- განაცხადა მაღლაფერიძემ.
„მოამბის“ თანამშრომლებისთვის ე.წ. ატესტაციის ჩატარებასთან დაკავშირებით განცხადება რამდენიმე დღის წინ, საზოგადოებრივი მაუწყებლის გენერალური დირექტორის მრჩეველმა ია ანთაძემ გააკეთა.
ანთაძის ინფორმაციით, კომისიამ უნდა აიღოს სიუჟეტები, რომელიც ბოლო 6 თვის განმავლობაშია მომზადებული და ამ სიუჟეტის მიხედვით უნდა შეაფასონ ჟურნალისტები.
მისივე განცხადებით, იმ შემთხვევაში თუ აღნიშნულ გეგმას სამეურვეო საბჭო დაამტკიცებს, პროცედურები მაუწყებელზე უკვე არსებული ნორმების დაცვით ჩატარდება.
ანთაძე არ აკონკრეტებს, როდისთვის იგეგმება თანამშრომლების კვალიფიკაციის შემოწმება. თუმცა, ამბობს, რომ ატესტაცია მაუწყებელში დიდი ხნის წინ დაიგეგმა.