ლევან იზორია ნატოს თავდაცვის მინისტერიალის ფარგლებში ბრიუსელში შეხვედრებს განაგრძობს
თავდაცვის მინისტერიალზე ქართულ მხარესთან მთავარი განსახილველი საკითხები ნატოს უელსისა და ვარშავის სამიტების გადაწყვეტილებების, კერძოდ, ნატო-საქართველოს არსებითი პაკეტის და ახალი ინიციატივების განხორციელების პროცესი, თავდაცვის სფეროში მიმდინარე რეფორმები და საქართველოსა და შავი ზღვის რეგიონში არსებული უსაფრთხოების გარემო იქნება.
საქართველოს თავდაცვის მინისტრმა უკვე გამართა შეხვედრები ლიტველ და რუმინელ კოლეგებთან. რუმინეთის თავდაცვის მინისტრთან გაბრიელ-ბენიამინ ლესთან განხილვის მთავარი საკითხი შავი ზღვის რეგიონის უსაფრთხოების გაძლიერება და ამ კუთხით საქართველოს ჩართულობა იყო. მინისტრებმა ქვეყნებს შორის თანამშრომლობის გაღრმავების საკითხებზეც იმსჯელეს.
ნატოს არაწევრ პარტნიორ ქვეყნებს შორის საქართველო ერთადერთი ქვეყანაა, რომელთანაც, მინისტერიალის ფარგლებში, ნატო-საქართველოს კომისიის სხდომა გაიმართება.
ალიანსის შტაბ-ბინაში საქართველოს თავდაცვის მინისტრი ლევან იზორია ხვალ ნატოს გენერალურ მდივან იენს სტოლტენბერგთან და საერთაშორისო უსაფრთხოების საკითხებში აშშ-ის თავდაცვის მდივნის თანაშემწე კენეთ ჰენდელმანთან ორმხრივ შეხვედრებს გამართავს.