დღეს დეპუტატი ირაკლი აბესაძეც გამოკითხეს. ,,ევროპული საქართველოსთვის,, წევრი მოსამართლე ნაზღაიძის საქმეზე მთავარ პროკურატურაში გამომძიებლის კითხვებს 3 საათის განმავლობაში პასუხობდა.
აბესაძის თქმით, საგამოძიებო უწყება ახლა დაინტერესებულია, რომ საქმეს მოსამართლის ოჯახი საერთოდ ჩამოაცილოს.
დეპუტატი დაზარალებულის სტატუსით მოსამართლე ნაზღაიძის ძმისთვის 1 მილიონი ლარის ქონების გადაცემის საქმეზე გამოძიების დაწყებას და თბილისის მერისა და მერიის შესაბამისი სამსახურების თანამდებობის პირების დაკითხვასაც მოითხოვს.
მოსამართლე ნატა ნაზღაიძის ძმა ზვიად ნაზღაიძე კი ადასტურებს, რომ პროკურატურაში დაკითხვაზე თავადაც იმყოფებოდა. მისივე განმარტებით, გამოძიებას კითხვები მიწის იმ ნაკვეთთან დაკავშირებით ჰქონდა, რომელზეც მერიამ კომპენსაცია გასცა.