უეფას ჩემპიონთა ლიგის გათამაშებაში გუშინ მერვედფინალური ეტაპი განახლდა. შემდგომი ეტაპისკენ უდიდესი ნაბიჯი გადადგა "პარი სენ ჟერმენმა".

ფრანგულმა კლუბმა საკუთარ სტად დე ფრანსზე, კატალონიის "ბარსელონა" 4-0 დაამარცხა. აღსანიშნავია, რომ მასპინძლები მთელი მატჩის განმავლობაში დომინირებდნენ.

პარიზელებმა ტაიმი ანხელ დი მარიას და იულიან დრაქსლერის გოლებით, 2-0 მოიგეს. მეორე ნახევრის მეათე წუთზე, კურზავას გადაცემის შემდეგ, დი მარიამ დუბლი გაიფორმა. "ბასრას" განადგურებას, წერტილი ედინსონ კავანიმ, 72-ე წუტზე დაუსვა და თამაშის საბოლოო ანგარიში დააფიქსირა. ამ წყვილის განმეორებითი მატჩი რვა მარტს ნოუ კამპზე შედგება.

გუშინდელი დღის მეორე შეხვედრაში ლისაბონის "ბენფიკამ" ესტადიო და ლუჟზე დორტმუნდის "ბორუსია" მიიღო და მინიმალური სხვაობით, 1-0 დაამარცხა. თამაშის ერთადერთი გოლი, 48-ე წუთზე, ბერძენმა ფორვარდმა კოსტას მიტროღლუმ გაიტანა.

აღსანიშნავია, რომ დორტმუნდი მთელი მატჩის განმავლობაში ფლობდა უპირატესობას და 58-ე წუთზე ანგარიშის გათანაბრებაც შეეძლო, თუმცა პიერ ემერიკ ობამეინგმა პენალტი ვერ გამოიყენა. ამ წყვილში ყველაფერი განმეორებით შეხვედრაში დორტმუნდის სიგნალ იდუნა პარკზე გადაწყდება.

დღეს კიდევ ორი მერვედფინალური დაპირისპირება გაიმართება, მიუნხენის "ბაიერნი" ლონდონის "არსენალს", ხოლო მადრიდის "რეალი" "ნაპოლის" უმასპინძლებს.

ორივე მატჩის პირდაპირ რეპორტაჟს საზოგადოებრივი მაუწყებელი შემოგთავაზებთ.