თბილისის საქალაქო სასამართლოს ყოფილი თავმჯდომარე მამუკა ახვლედიანი მოსამართლის წინაშე მოწმის სტატუსით დღეს დაიკითხება. სასამართლომ შინაგან საქმეთა სამინისტროს შუამდგომლობა დააკმაყოფილა, რის საფუძველზეც მამუკა ახვლედიანს მოსამართლის წინაშე 13:00 საათზე დაკითხავენ.

საქმე ეხება შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარ სამმართველოში მიმდინარე გამოძიებას ტელეკომპანია „რუსთავი 2“-ის გენერალური დირექტორის, ნიკა გვარამიას კომპიუტერულ სისტემაში უნებართვო შეღწევის, მისი და მამუკა ახვლედიანის პირადი საუბრის ამსახველი ვიდეოჩანაწერის უკანონოდ მოპოვებისა და გავრცელების ფაქტზე.

სასამართლოს ყოფილი თავმჯდომარე გამოძიებას უნდობლობას უცხადებს, თუმცა აცხადებს, რომ დღეს დაკითხვაზე გამოცხადდება. ახვლედიანის თქმით, ჩანაწერი დამონტაჟებულია.

აღნიშნულ საქმეზე საქალაქო სასამართლოში მოსამართლის წინაშე ნიკა გვარამია გუშინ დაიკითხა. ნიკა გვარამია ვარაუდობს, რომ გამოძიება ცდილობს, მის მიმართ საქმე ქრთამის ნაწილით ან ცრუ ჩვენების მიმართულებით აღძრას.

რუსთავი 2“-ის გენერალური დირექტორი გამოსაკითხად შინაგან საქმეთა სამინისტროში 14 თებერვალს, 18:00 საათზე დაიბარეს. თუმცა ნიკა გვარამიამ საჯაროდ განცხადა, რომ შინაგან საქმეთა სამინისტროში მისვლას არ აპირებდა და სასამართლოში დაკითხვა მოითხოვა. ამის გამო, გამოძიებამ შუამდგომლობით მიმართა სასამართლოს, რათა გვარამია მოსამართლის წინაშე მოწმის სახით დაეკითხათ.

როგორც შსს-ს მიერ რამდენიმე დღის წინ გავრცელებულ განცხადებაშია აღნიშნული, 2016 წლის 4 ოქტომბერს youtube-ზე გამოქვეყნდა ნიკა გვარამიასა და მამუკა ახვლედიანს შორის პირადი საუბრის ამსახველი ჩანაწერი - „ნიკა გვარამია ჰპირდება მოქმედ მოსამართლეს 6 მილიონიდან წილს“.

უწყების ცნობით, ახვლედიანისა და გვარამიას საუბრის ამსახველ აუდიოჩანაწერს ექსპერტიზა ჩაუტარდა და დადგინდა, რომ ჩანაწერზე მონტაჟის კვალი არ აღინიშნება.