ამერიკის შეერთებული შტატების პრეზიდენტის ყოფილმა მრჩეველმა მაიკლ ფლინმა, რომელმაც პოსტი რუსეთთან დაკავშირებული სკანდალის გამო დატოვა, გადადგომამდე ერთი კვირით ადრე, რუსეთ-უკრაინის ურთიერთობების ნორმალიზების და რუსეთის წინააღმდეგ არსებული სანქციების გაუქმების შესახებ წინადადება მიიღო. ამის შესახებ ინფორმაციას გამოცემა „ნიუ-იორკ თაიმსი“ ავრცელებს.
გამოცემის ცნობით, დოკუმენტი რომელიც მაიკლ ფლინს დონალდ ტრამპის ადვოკატმა დაბეჭდილი კონვერტით მიუტანა, უმაღლესი რადას დეპუტატის, ანდრეი არტემენკოს მონაწილეობით არის შექმნილი და ის უკრაინაში რეფერენდუმის გამართვას მოიაზრებდა, რუსეთისთვის ყირიმის 50 ან 100 წლით არენდით გადაცემის შესახებ.
გავრცელებული ცნობით, უკრაინელმა დეპუტატმა ტრამპის ადვოკატს პირადად მიმართა. კონვერტი ასევე მოიცავდა პრეზიდენტ პეტრო პოროშენკოს კორუფციული საქმიანობის შესახებ მონაცემებს, რომელიც საკმარისი მტკიცებულება იქნებოდა მისი სახელმწიფოს მეთაურობიდან გადაყენებისთვის.