გერმანიის ფედერაციული რესპუბლიკის ბუნდესტაგის წევრი, ევროპის საბჭოს საპარლამენტო ასამბლეაში გერმანიის ფედერაციული რესპუბლიკის ბუნდესტაგის დელეგაციის ხელმძღვანელი, აქსელ ფიშერი თბილისშია. ის თბილისის საერთაშორისო აეროპორტში რამდენიმე წუთის წინ ჩამოფრინდა.
ვიზიტის ფარგლებში, გერმანიის ფედერაციული რესპუბლიკის ბუნდესტაგის წევრი და ევროპის საბჭოს საპარლამენტო ასამბლეაში გერმანიის ფედერაციული რესპუბლიკის ბუნდესტაგის დელეგაციის ხელმძღვანელი პირველ შეხვედრას 20 თებერვალს, საქართველოს პარლამენტის თავმჯდომარესთან, ირაკლი კობახიძესთან გამართავს.
საქართველოს საკანონმდებლო ორგანოში დაგეგმილია აქსელ ფიშერის შეხვედრები საგარეო ურთიერთობათა კომიტეტის თავმჯდომარის პირველ მოადგილესთან, ნინო გოგუაძესთან, ევროპასთან ინტეგრაციის კომიტეტის თავმჯდომარის პირველ მოადგილესთან, ირინა ფრუიძესთან, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარესთან, სოფო კილაძესთან, ასევე, ფრაქცია „საქართველოს პატრიოტების“, ფრაქცია „ნაციონალური მოძრაობის“, საპარლამენტო უმცირესობისა და საპარლამენტო უმრავლესობის წევრებთან.
ვიზიტის პროგრამით გათვალისწინებულია გერმანიის ფედერაციული რესპუბლიკის ბუნდესტაგის წევრის შეხვედრები აღმასრულებელი ხელისუფლების წარმომადგენლებთან: საქართველო საგარეო საქმეთა მინისტრის მოადგილესთან, ვახტანგ მახარობლიშვილთან და სახელმწიფო მინისტრთან ევროპულ და ევროატლანტიკურ სტრუქტურებში ინტეგრაციის საკითხებში, ვიქტორ დოლიძესთან.
აქსელ ფიშერი ივანე ჯავახიშვილის სახელობის თბილისის სახელმწიფო უნივერსიტეტსაც ეწვევა, სადაც უნივერსიტეტის რექტორს, გიორგი შარვაშიძეს და უნივერსიტეტის იურიდიული ფაკულტეტის დეკანს, ირაკლი ბურდულს შეხვდება.
კულტურული პროგრამის ფარგლებში, აქსელ ფიშერი თბილისის, მცხეთისა და სიღნაღის ღირსშესანიშნაობებს დაათვალიერებს.
გერმანიის ფედერაციული რესპუბლიკის ბუნდესტაგის წევრი და ევროპის საბჭოს საპარლამენტო ასამბლეაში გერმანიის ფედერაციული რესპუბლიკის ბუნდესტაგის დელეგაციის ხელმძღვანელი საქართველოს 24 თებერვალს დატოვებს.