უნდა გაირკვეს ვინ გააკეთა, რატომ გააკეთა, რისთვის, რას ისახავდა მიზნად ვიდეომიმართვის არასრული ვერსიის გავრცელება, სხვა შემთხვევაში, შესაძლოა, უმართებულო დასკვნებს მიეცეს საფუძველი, ამის შესახებ საზოგადოებრივს პროტოპრესვიტერმა მამა გიორგი ზვიადაძემ სატელეფონო ინტერვიუში განუცხადა. ის გამოეხმაურა „ობიექტივის" მიერ პატრიარქის ვიდეომიმართვის ახალი ვერსიის გავრცელებას.

ზვიადაძის თქმით, რთული სათქმელია, ვის ინტერესში შეიძლება შედიოდეს მსგავსი ქმედება. მამა გიორგი ზვიადაძე საკითხის ძირფესვიანად შესწავლამდე ვარაუდებისა და ეჭვების გამოთქმისგან თავს იკავებს.

„საქართველოს საპატრიარქო დეტალურად შეისწავლის აღნიშნულ საკითხს და შემდეგ აცნობებს საქართველოს მოსახლეობას საქმის დეტალებს. საპატრიარქო ძალიან დიდ პატივს სცემს საქართველოს მოსახლეობას და აუცილებლად მიაწვდის შესაბამის ინფორმაციას, თუმცა მანამდე აუცილებელია, რომ საკითხი კარგად და გამოწვლილვით იქნას შესწავლილი" - განაცხადა მამა გიორგი ზვიადაძემ.

როგორც პროტოპრესვიტერმა საზოგადოებრივთან სატელეფონო ინტერვიუში აღნიშნა, პატრიარქის ვიდეომიმართვის ის ნაწილი, რომელიც პირველად გავრცელებულ ვიდეოში ამოჭრილი იყო, საფუძვლიანად ცვლის პატრიარქის ვიდეომიმართვის კონტექსტსა და შინაარსს.

„ვიდეომასალის სრულ ვერსიაში ჩანს, რომ გარკვეულ კითხვებს სვამს პატრიარქი, ეს კითხვები ძალიან მნიშვნელოვანია. ჩვენ გვინდა, რომ ყველაფერი მშვიდობიანად იყოს. აუცილებელია, რომ საშუალება მივცეთ, გამოძიება ობიექტურად წარიმართოს. თუ აღმოჩნდება გამოძიების შედეგად გარკვეული მასალები, ეკლესიას გვმართებს, პირდაპირ შევხედოთ და თვალი გავუსწოროთ სიმართლეს" - განაცხადა პროტოპრესვიტერმა.

როგორც მამა გიორგი ზვიადაძემ აღნიშნა, ის დღეს პატრიარქს ტელეფონით ვიდეომიმართვის ახალი ვერსიის გავრცელებამდე ესაუბრა და მან საქართველოს მოსახლეობას სიმშვიდისკენ მოუწოდა.

„პატრიარქმა მითხრა, რომ საქართველოს მოსახლეობა დამემშვიდებინა და სიმშვიდისკენ მომეწოდებინა. მან ბრძანა, რომ არ არსებობს საქართველოს ეკლესიაში შფოთვისა და დაპირისპირების მიზეზი. ის საქართველოში ორშაბათს ჩამობრძანდება" - განაცხადა პროტოპრესვიტერმა.

სრულიად საქართველოს კათოლიკოს-პატრიარქის ვიდეო-მიმართვის ახალი ვერსია დღეს „ობიექტივმა" საკუთარ ეთერში გაავრცელა. ვიდეომასალის პირველად გავრცელებულ ვერსიაში არ ყოფილა შემდეგი ფრაზა: „რა მოხდა? რატომ მოხდა, რომ მამა გიორგი ლაპარაკობს ხან ერთს ხან მეორეს. ვისი დავალებით ხდება ეს?“.

ბერლინიდან, საქართველოს პატრიარქის, უწმინდესისა და უნეტარესის, ილია მეორის მიმართვა 16 თებერვალს ზუგდიდისა და ცაიშის ეპარქიის „ფეისბუქის“ გვერდზე ორ ნაწილად გავრცელდა.

ილია მეორეს ლაპარასკოპიული მეთოდით 13 თებერვალს ნაღვლის ბუშტის ქირურგიული ოპერაცია ბერლინში ჩაუტარდა.

რაც ეხება დეკანოზ გიორგი მამალაძის დაკავებას, პროკურატურამ საპატრიარქოს ქონების მართვის სამსახურის ხელმძღვანელის მოადგილე, დეკანოზი გიორგი მამალაძე მკვლელობის მომზადების ბრალდებით დააკავა.

უწყების ცნობით, დეკანოზი ერთ-ერთი პირის ციანიდით მოწამვლას აპირებდა. პროკურატურა არ აკონკრეტებს, ვის მკვლელობას ამზადებდა საპატრიარქოს ქონების მართვის სამსახურის ხელმძღვანელი. დეკანოზი გიორგი მამალაძე წარდგენილ ბრალდებას არ აღიარებს.