საქართველოს ეროვნული ოლიმპიური კომიტეტის პრეზიდენტი ლერი ხაბელოვი, სპორტისა და ახალგაზრდობის საქმეთა მინისტრ, ტარიელ ხეჩიკაშვილთან ერთად ზამთრის ახალგაზრდული ოლიმპიური ფესტივალიდან დაბრუნებულ სპორტსმენებს შეხვდა.
ხაბელოვმა, ფესტივალის ბრინჯაოს მედლის მფლობელ ნიკა ეგაძეს და მის მწვრთნელს, ლელა ჩოფიკაშვილს ფულადი ჯილდო გადასცა.
ახალგაზრდულ ოლიმპიურ ფესტივალზე საქართველოს 6 წარმომადგენელი გამოვიდა. ყველაზე შედეგიანი კი 14 წლის მოციგურავე ნიკა ეგაძე იყო.
დღესვე, ეროვნულ ოლიმპიურ კომიტეტში, აღმასრულებელი კომიტეტის სხდომა ჩატარდა, რომლის დასრულების შემდეგაც, ლერი ხაბელოვმა საერთაშორისო ოლიმპიური კომიტეტის მიერ გამოგზავნილ, ზამთრის 23-ე ოლიმპიურ თამაშებზე, საქართველოს დელეგაციის ოფიციალური მიწვევის დოკუმენტს მოაწერა ხელი.
შეგახსენებთ, რომ ზამთრის ოლიმპიადა მომავალ წელს, სამხრეთ კორეაში გაიმართება.