მამა გიორგი მამალაძის ახალი ადვოკატის, მიხეილ რამიშვილის განცხადებით, მამალაძეს ოფიციალურად ბრალი პატრიარქის მდივან-რეფერენტის, შორენა თეთრუაშვილის მკვლელობის მცდელობაში ედება. ადვოკატ მიხეილ რამიშვილს გაუთქმელობის დოკუმენტზე არ აქვს ხელი მოწერილი, შესაბამისად მან საქმეზე ღიად ისაუბრა. ადვოკატის თქმით, მამა გიორგი მამალაძე ბრალს არ აღიარებს.
„საბრალდებო დოკუმენტში მითითებულია შორენა თეთრუაშვილის მკვლელობის მცდელობა. ასევე, როდესაც განხორციელდა მამა გიორგის დაკავება, მისი ბარგი 6 საათისა და 40 წუთის დაგვიანებით მიიტანეს", - განაცხადა ადვოკატმა მიხეილ რამიშვილმა.
კითხვაზე, შესაძლებელია თუ არა, რომ ბარგში ციანიდი ჩაედოთ, მიხეილ რამიშვილი პასუხობს, რომ ჯერ ამასთან დაკავშირებით რაიმე ვერსია არა აქვს.
მამა გიორგი მამალაძე ჯერჯერობით ისევ კლინიკაში რჩება. ამ წუთებში ექიმების კონსილიუმი მიმდინარეობს. რამდენიმე წუთში გაირკვევა დარჩება თუ არა დეკანოზი გიორგი მამალაძე საავადმყოფოში.