თბილისის საკრებულოს ოპოზიციონერი დეპუტატები, მოსამართლე ნატა ნაზღაიძის ოჯახისთვის ერთი მილიონი ლარის ღირებულების ქონების გადაცემის საკითხთან დაკავშირებით, თბილისის მერ დავით ნარმანიას საკრებულოს რიგგარეშე სხდომაზე იბარებენ.

ნარმანიას საკრებულოში დაბარება მას შემდეგ გადაწყდა, რაც გუშინ საკრებულოში დეპუტატების მიერ დაბარებული მერის არცერთი მოადგილე და ქონების მართვის სააგენტოს ხელმძღვანელი არ გამოცხადდა.

როგორც საკრებულოს დამოუკიდებელმა დეპუტატმა, ალეკო ელისაშვილმა აღნიშნა, ისინი ხელმძღვანელობენ თვითმმართველობის კოდექსითა და საკრებულოს რეგლამენტით და როდესაც თბილისის საკრებულოს დეპუტაციის 1/5 ითხოვს მერის მოსვლას, ეს მოთხოვნა უნდა შესრულდეს.

ელისაშვილის განცხადებით, სახეზეა ძალიან მძიმე კორუფციული გარიგება, რომელთან დაკავშირებითაც ბევრი ღია კითხვაა დარჩენილი და ამ საქმეზე კონკრეტულმა პირებმა უნდა აგონ პასუხი.

საკრებულოში გუშინ დაბარებული მერის მოადგილეებისა და ქონების მართვის სააგენტოს ხელმძღვანელის გამოუცხადებლობას რეგლამენტის უხეშ დარღვევად აფასებს საკრებულოს დამოუკიდებელი დეპუტატი სევდია უგრეხელიძე. როგორც მან აღნიშნა, ნარმანიას ნება არ იყო, მოვიდოდნენ თუ არა ეს ადამიანები გუშინ საკრებულოში.

ფრაქცია „რესპუბლიკელების“ თავმჯდომარე ხათუნა სამნიძემ კონკრეტულ საკითხებზე ისაუბრა, რომლებიც, მისი თქმით, საკრებულოს უახლოესი სხდომოს დღის წესრიგში უნდა იქნას გათვალისწინებული. ესენია: 23 დეკემბრის დადგენილების ბათილად ცნობა, რომლის თანახმად ნაზღაიძის ოჯახს ქონება გადაეცა, ასევე წესში ცვლილებების შეტანის საკითხი, რომლის მიხედვით სტიქიის დროს დაზარალებული 13 ოჯახისთვის ზარალის ანაზღაურება უნდა მოხდეს და თბილისის მერის საკრებულოს სხდომაზე მოსვლა.

რეგლამენტის მიხედვით, საკრებულოს რიგგარეშე სხდომის ჩანიშვნა 7 დღის ვადაში უნდა მოხდეს.