დეკანოზ გიორგი მამალაძის მოსანახულებლად მისული ჭყონდიდის მიტროპოლიტი პეტრე ცაავა სასჯელაღსრულების მე-9 დაწესებულებაში, ე.წ. მატროსოვის ციხეში არ შეუშვეს.
„ძალიან მოულოდნელი პასუხი მივიღე, რომ არ მიშვებენ მამა გიორგის სანახავად. ძალიან დიდ შეცდომას უშვებს ხელისუფლება ამ შემთხვევაში. მე მინდოდა გავსაუბრებოდი. დამელოცა, გამემხნევებინა და დღევანდელი დღე მიმელოცა მისთვის“, - განაცხადა მეუფე პეტრემ ჟურნალისტებთან კომენტარში.
მისი თქმით, სასჯელაღსრულების დაწესებულებაში არ შეშვების მიზეზი არ განუმარტეს.
რაც შეეხება პატრიარქის პრესმდივნის, მამა მიქაელ ბოტკოველის განცხადებას იმის შესახებ, რომ სახელმწიფოს თხოვნა იყო, მღვდელმთავრებმა მაქსიმალურად თავი შეიკავონ საპატიმრო დაწესებულებაში მისვლისგან, მეუფე პეტრემ განაცხადა, რომ ის ეთანხმება პოზიციას, სასულიერო პირებმა არ გააკეთონ განცხადებები გამოძიების მიმდინარეობისას, თუმცა დაკავებულს სასულიერო პირთან შეხვედრის, ლოცვისა და ზიარების უფლება ყველა დროში ჰქონდა.
„ჩვენს მიმართ თხოვნა იყო, რომ გამოძიების პროცესში არ გაგვეკეთებინა განცხადებები, რასაც აბსოლუტურად ვეთანხმები, მაგრამ ის, რომ მამა გიორგი, დაპატიმრებული მღვდელი და უდანაშაულო ადამიანი სასულიერო პირმა არ მოინახულოს, ჩვენ თუ გადავხედავთ ჩვენი ქრისტიანობის ისტორიას, ყოველთვის წარმართი მმართველების დროსაც კი, დაკავებულ ქრისტიანებთან მოძღვრებს უშვებდნენ და ჰქონდათ მათ ლოცვის და ზიარების საშუალება“, - აღნიშნა მეუფე პეტრემ.
ჭყონდიდის მიტროპოლიტი ასევე გამოეხმაურა დეკანოზ გიორგი მამალაძის თავდებით გათავისუფლებასთან დაკავშირებულ ინფორმაციას. მეუფე პეტრეს თქმით, ეს პოზიცია პირველად მან დააფიქსირა, შემდეგ სასულიერო იერარქებთან შეხვედრისას პატრიარქიც გამოვიდა ანალოგიური ინიციატივით, თუმცა, მღვდელმთავრებმა განსხვავებული პოზიციები დააფიქსირეს.
„როდესაც პატრიარქი შეგვხვდა, ეს მოსაზრება [თავდებით გათავისუფლების თაობაზე] გამოთქვა მან, მე დავეთანხმე, მაგრამ განსხვავებული პოზიციები გამოთქვეს მღვდელმთავრებმა, ამიტომ დავთანხმდით, რომ თუ გამოძიებას ხელს შეუშლიდა მამა გიორგის გარეთ ყოფნა, მაშინ ჯობდა მას მოეთმინა, ეტვირთა ეს ჯვარი და დარჩენილიყო საპატიმროში“, - აღნიშნა მეუფე პეტრემ.
საპატიმროსთან მისულმა ჭყონდიდის მიტროპოლიტმა ასევე განაცხადა, რომ დეკანოზ გიორგი მამალაძეს საპატიმროში ინფორმაციის მიღების შესაძლებლობა არ აქვს.
„მას ტელევიზორი არ აქვს. ტექნიკური მიზეზებით აფერხებენ დღემდე ამ საკითხის მოგვარებას“, - განაცხადა მან.
ამ წუთებში დაკავებულ დეკანოზთან შესახვედრად მისი ადვოკატები შევიდნენ.