მამა გიორგი მამალაძესთან მნახველების შეშვების საკითხზე განმარტებას აკეთებს სასჯელაღსრულების სამინისტრო. უწყების განცხადებით, ბრალდებულ გ.მ.-სთან მნახველების შესვლა შეზღუდულია გამოძიების ინტერესებიდან და უსაფრთხოების საკითხებიდან გამომდინარე, თუმცა, ბრალდებულთან შეხვედრის საშუალება შეუზღუდავად აქვთ მის ადვოკატებსა და სახალხო დამცველს.
უწყება ასევე ეხმაურება ტელევიზორით სარგებლობის საკითხს.
„რაც შეეხება ტელევიზორით სარგებლობას, ბრალდებულ გ.მ.-ს, რომელიც კლინიკიდან პენიტენციურ დაწესებულებაში გუშინ საღამოს გადაიყვანეს, ამ საკითხთან დაკავშირებით დაწესებულების ადმინისტრაციისთვის არ მიუმართავს“, - აცახდებენ უწყებაში.
შეგახსენებთ, დღეს დეკანოზ გიორგი მამალაძის მოსანახულებლად მისული ჭყონდიდის მიტროპოლიტი პეტრე ცაავა სასჯელაღსრულების მე-9 დაწესებულებაში, ე.წ. მატროსოვის ციხეში არ შეუშვეს.
ჟურნალისტებთან საუბრისას მეუფე პეტრემ აღნიშნა, რომ გიორგი მამალაძეს ინფორმაციის მიღების შესაძლებლობა არ ეძლევა.