სენაკში რკინიგზის სადგურის წინ მდებარე დასასვენებელი პარკის გასხვისებას სენაკის სამოქალაქო საზოგადოება აპროტესტებს.

როგორც „მოამბის“ კორესპონდენტი ადგილიდან იუწყება, აქციის მონაწილეებმა ხელმოწერების შეგროვება უკვე დაიწყეს და როგორც აცხადებენ, შეგროვებულია 3000-მდე ხელმოწერა.

აქციის ორგანიზატორების ინფორმაციით, სენაკის გამგეობამ 49 კვ.მ კერძო სტომატოლოგიური კაბინეტის მეპატრონე ანასტასია ხუფენიას გადასცა.

მათივე თქმით, ხუფენია სენაკის გამგეობის აუდიტის სამსახურის უფროსის, მერაბ ბასილიას მეუღლეა. აღნიშნულ ფაქტს აქციის მონაწილეები კორუფციულ გარიგებად აფასებენ.

როგორც ცნობილია, აქციის მონაწილეებს სენაკის სასამართლოში სარჩელი უკვე შეტანილი აქვთ.

მათივე თქმით, პარკის დანარჩენი ტერიტორიის გადაცემა იუსტიციის სახლისთვის იგეგმება.

„შევთავაზეთ ალტერნატიული ფართი, თუმცა ამაზე გამგეობა არ დაგვთანხმდა“,- აცხადებენ აქციის მონაწილეები.

ისინი ამ ეტაპზე სამართლებრივი გზით იბრძვიან და მათ იურიდიულ დახმარებას „ახალგაზრდა იურისტთა ასოციაციის“ ზუგდიდის ოფისი უწევს.

სენაკის გამგეობის იურიდიული სამსახურის უფროსი ნანა ზარანდია კი აცხადებს, რომ არანაირი კორუფციული გარიგება არ მომხდარა.

„ტერიტორია არის სენაკის მუნიციპალიტეტის და ჩვენ ეს ტერიტორია გადავეცით არა საკუთრებაში, არამედ სარგებლობის უფლებით. ვიცით სარჩელი შეიტანეს, თუმცა ჯერჯერობით სასამართლოში, როგორც მხარე, არ ვართ წარმოდგენილი“,- განაცხადა ნანა ზარანდიამ.