დაკავებული დეკანოზის საქმეზე საგამოძიებო მოქმედებები დაიწყო. ექსპერტიზისთვის ხმის ნიმუშებს იღებენ, რათა დადგინდეს, ავთენტურია თუ არა პროკურატურის მიერ ნახსენები ფარული აუდიოჩანაწერები. გროვდება ხელწერის ნიმუშებიც, რაც საქმეში წერილობითი მასალის შესაძლო არსებობაზეც მიუთითებს.
მოლოდინის მიუხედავად, მამა გიორგი მამალაძეს დღეს აღარ დაკითხავენ. ადვოკატები პროკუროტურას პროცესის ხელოვნურად გაჭიანურებაში ადანაშაულებენ.
რამდენიმე ჩანაწერი უკვე მოასმენინეს დეკანოზის ახალ ადვოკატს, რომელიც საუბრის დროს ბრალდებულის მხრიდან ციანიდის ხსენებას უარყოფს.
ცნობილია, რომ დაკითხვის დროს საპატრიარქოს ქონების მართვის სამსახურის უფროსის მოადგილე იმ იარაღზეც ისაუბრებს, რომელიც, გამოძიების მტკიცებით, მისი სახლიდან ამოიღეს.
მამა გიორგი მამალაძის გარდა, გამომძიებლები შორენა თეთრუაშვილსაც მოუსმენენ. პატრიარქის მდივან-რეფერენტი საგამოძიებო უწყებაში ამ დრომდე არ დაუბარებიათ.