ინგლისის პრემიერლიგის მოქმედი ჩემპიონი "ლესტერ სიტი" მთავარი მწვრთნელის გარეშე დარჩა.

გუშინ კლუბის ხელმძღვანელებმა იტალიელი სპეციალისტი კლაუდიო რანიერი გაათავისუფლეს დაკავებული თანამდებობიდან. ეს ინფორმაცია გუნდის ოფიციალურმა ვებგვერდმა დაადასტურა.

გათავისუფლების მიზეზი ბოლო პერიოდში ლესტერის ცუდი შედეგები გახდა, რომელიც ამჟამად ინგლისის ჩემპიონატში გასავარდნ ზონასთან ახლოსაა.
ჩემპიონთა ლიგის გათამაშებაში კი, მერვედფინალის პირველი მატჩი "სევილიასთან" 1-2 წააგო, თუმცა საპასუხო შეხვედრას საკუთარ მოედანზე ჩაატარებს.

შეგახსენებთ, რომ 65 წლის რანიერიმ ლესტერი 2015 წლის ივლისში ჩაიბარა და გუნდი არნახულ შედეგამდე მიიყვანა. მელიებმა პრემიერლიგა მოიგეს. აღსანიშნავია, რომ გასულ წელს არაერთმა ავტორიტეტულმა გამოცემამ წლის საუკთესო მწვრთნელად სწორედ რანიერი დაასახელა.