ქალაქში უამრავი საქმე გვაქვს გასაკეთებელი და პოლიტიკური შოუსთვის არ მცალია, - ამის შესახებ თბილისის მერმა დავით ნარმანიამ განაცხადა. ის გამოეხმაურა დედაქალაქის საკრებულოს ოპოზიციის წევრებს, რომლებიც ითხოვენ, თბილისის მერი ოთხშაბათს საკრებულოში გამოცხადდეს.
როგორც ნარმანიამ აღნიშნა, მისი პოლიტიკური გუნდი ოპოზიციონერი დეპუტატების ცინიკურ და აგდებულ დამოკიდებულებას ღირსეულად დახვდა და, ამ ეტაპზე, საკრებულოში მისი მისვლის არანაირი საფუძველი არ არსებობს.
“გუშინ პოლიტიკური შოუ არ შედგა და ჩვენმა უმრავლესობამ ღირსეულად უპასუხა მათ მიერ წამოწყებულ იმ ცალკეულ ცინიკურ საკითხებს, რაზეც ჩვენ ღირსეული პასუხი გვაქვს. ქმედებები, რაც ჩვენი მხრიდან განხორციელდა თავის დროზე იყო კანონიერი ყველა წესისა და პროცედურის დაცვით. სწორედ ამიტომ, ამ ყველაფრის გაგრძელებას ცდილობენ, რომ ჩემი ძალით მისვლა მოხდეს საკრებულოში. თუმცა ხაზგასმით მინდა აღვნიშნო, რომ ვერ ეღირსებიან. მე ოთხშაბათსაც არ მივალ საკრებულოში რადგან ამ შოუს არ უნდა მოჰყვეს გაგრძელება”, - განაცხადა დავით ნარმანიამ.
თბილისის მერის თქმით, ქალაქში უამრავი საქმე აქვს გასაკეთებელი და პოლიტიკური შოუსთვის არ სცალია.
თბილისის საკრებულოს ოპოზიცია გუშინ, საკრებულოს სხდომაზე, დავით ნარმანიას მისვლასა და მოსამართლე ნატა ნაზღაიძის ოჯახისთვის მილიონიანი ქონების გადაცემის საკითხზე მათთვის ახსნა-განმარტების მიცემას ითხოვდა. თბილისის მერი საკრებულოში არ მივიდა.