ხმაური ქუთაისში - გარდაცვლილი პაციენტის ახლობლები ექიმებს უყურადღებობაში ადანაშაულებენ. მათი განცხადებით, 18 წლის გოგონას დაღუპვის მიზეზი სწორედ ექიმების დაუდევრობა გახდა.
გარდაცვლილის ახლობლები მკურნალ ექიმთან შეხვედრას ითხოვდნენ. ადგილზე მობილიზებულნი იყვნენ სამართალდამცველებიც.
ახლობლების თქმით, გოგონა სახლში უგონო მდგომარეობაში ნახეს, სასწრაფო დახმარებამ ის ჯერ ჭიათურაში გადაიყვანა, მოგვიანებით კი რეანომობილით ქუთაისში შპს „უნიქალ მედის" კლინიკაში გადმოიყვანეს. მათივე განცხადებით, ექიმები ამტკიცებდნენ, რომ გოგონას თვითმკვლელობის მიზნით წამლები ჰქონდა მიღებული, რასაც ოჯახის წევრები არ ადასტურებენ.
რაც შეეხება კლინიკის მედპერსონალის პოზიციას, მათი განცხადებით, გოგონას თვითმკვლელობის მცდელობა ჰქონდა და ამ მიზნით წამლები ჰქონდა მიღებული. მათივე თქმით, პაციენტი კომატოზურ მდგომარეობაში შეიყვანეს კლინიკაში, ორი დღის შემდეგ ის გონს მოვიდა და კონტაქტური გახდა, შემდეგ კი მდგომარეობა დამძიმდა და გოგონას გადარჩენა ვეღარ მოხერხდა.
კლინიკის წარმომადგენლების განცხადებით, პაციენტის მშობელმა მათ განუცხადა, რომ გოგონას ფსიქიკური პრობლემები ჰქონდა, რის საფუძველზეც მათ ფსიქიატრი მოიწვიეს, რომელსაც პაციენტმა წამლების მიღების ფაქტი დაუდასტურა.