ევროკომისარი მიგრაციის, საშინაო საქმეთა და მოქალაქეობის საკითხებში, დიმიტრის ავრამოპულოსი საქართველოს ვიზალიბერალიზაციასთან დაკავშირებით მედია კონფერენციაზე განცხადებას აკეთებს.

​მისი თქმით, საქართველომ პროგრესული ნაბიჯი გადადგა და ის ევროპული ოჯახის წევრი გახდა.

"მე აბსოლუტურად დარწმუნებული გახლავართ, რომ საქართველო შეინარჩუნებს პროგრესის დონეს და საქართველო იგივე პასუხისმგებლობით გააგრძელებს მუშაობას, რათა შესრულდეს ვალდებულებები. უვიზო რეჟიმი იქნება ახალი შესაძლებლობები საქართველოსთვის. ეს გახლავთ წინ გადადგმული ნაბიჯი ევროკავშირის მიმართულებით. ევროკავშირი მოუთმენლად ელოდება მიესალმოს საქართველოს მოქალაქეებს, როგორც ტურისტებს, მეგობრებს, როგორ ოჯახის წევრებს. თქვენ შეგიძლიათ დაესწროთ შეხვედრებს, გამოიყენოთ ეს შესაძლებლობა ჟურნალისტებმა, გაიაროთ მოკლევადიანი სასწავლო კურსები", - განაცხადა პრესკონფერენციაზე დიმიტრის ავრამოპულოსმა.



მისი თქმით, ევროკავშირის ნაწილად ყოფნა სტაბილურობისა და პროგრესის გარანტია.

"იყო ნაწილი ევროკავშირის ნიშნავს იყო მშვიდობის, სტაბილურობის, პროგერსის, ტოლერანტობის და კეთილდღეობის ნაწილი. საქართველო დღეს უკვე მნიშვნელოვან გზავნილს უგზავნის ევროპას ევროპული მომავლისათვის. გილოცავთ და კეთილი იყოს თქვენი მობრძანება", - განაცხადა ევროკომისარმა მიგრაციის, საშინაო საქმეთა და მოქალაქეობის საკითხებში, დიმიტრის ავრამოპულოსმა.


ევროკავშირის საბჭომ დაამტკიცა ცვლილება რეგულაციაში, რომელიც საქართველოს მოქალაქეებისათვის უვიზო მიმოსვლის რეჟიმის შემოღებას ითვალისწინებს.

ევროპული საბჭოს მინისტრებმა გადაწყვეტილება რამდენიმე წუთის წინ მიიღეს.

1 მარტს 14:00 საათზე, ევროპული საბჭო და ევროპარლამენტი შეთანხმებას მოაწერენ ხელს.