პარტიზანი მებაღეები გლდანის მეოთხე მიკრორაიონში რვასართულიანი კორპუსის მშენებლობას აპროტესტებენ და სამშენებლო ტექნიკას ტერიტორიაზე არ უშვებენ, ამის შესახებ „მოამბის" ჟურნალისტი ადგილიდან იუწყება. ისინი მიმდინარე სამუშაოების შეჩერებას იმ მოტივით ითხოვენ, რომ მშენებლობასთან ახლოს სკვერი მდებარეობს.
პარტიზანი მებაღეები აქციას ადგილობრივი მოსახლეობაც შეუერთდა. რამდენიმე წუთის წინ, მცირე შელაპარაკება მოხდა მესაკუთრეებსა და აქციის მონაწილეებს შორის, თუმცა ვითარება მალევე განიმუხტა.
ადგილზე მობილიზებულია საპატრულო პოლიცია.
დღეს დილით გლდანში პარტიზანი მებაღეების აქტივისტს სცემეს. ორგანიზაციის წარმომადგენლები მუშების მხრიდან დაპირისპირებაზე საუბრობენ.
მშენებლობის წარმომადგენლების განცხადებით, მოსახლეობის 80% თანახმაა კორპუსის მშენებლობაზე. პარტიზანი მებაღეები კი, ყოველდღე მორიგეობენ და ადგილზე მუშაობის საშუალებას არ აძლევენ.