ოკუპირებული აფხაზეთის დეფაქტო ხელისუფლების გადაწყვეტილებით, 5 მარტიდან ნაბაკევი-ხურჩისა და ოტობაია-ორსანტიის ე.წ. გადასასვლელები დაიკეტება. როგორც „მოამბის" ჟურნალისტი იუწყება, ამის შესახებ ადგილობრივი მოსახლეობა უკვე ღიად საუბრობს. მოქალაქეები ამბობენ, რომ მოძრაობის გადასაკეტად მზად არის რკინა-ბეტონის კონსტრუქციები და რკინის ბადეები.

როგორც ოკუპირებული აფხაზეთიდან დევნილი მოსახლეობა „მოამბესთან" ინტერვიუში აცხადებს, ე.წ. გადასასვლელების ჩაკეტვის შემთხვევაში, ისინი გაუსაძლის მდგომარეობაში აღმოჩნდებიან, ვინაიდან მოუწევთ ისარგებლონ ენგურის ცენტრალური ხიდით ან ფახულანი-საბერიოს გადასასვლელით.

როგორც ცნობილია, გალის რაიონის დაბალი ზონის მოსახლეობას ენგურის ცენტრალურ ხიდზე მოსახვედრად, მინიმუმ, 33-37 კილომეტრის გავლა მოუწევს. ე.წ. გადასასვლელებით, ძირითადად, სარგებლობდნენ მოხუცები, ასევე მოსწავლეები, რომლებიც ზუგდიდის ქართულენოვან სკოლებში სწავლობდნენ, ავადმყოფები და ის მოქალაქეები, რომლებიც თავიანთი ნათესავების მოსანახულებლად მიდიოდნენ.

ნაბაკევი-ხურჩისა და ოტობაია-ორსანტიის ე.წ. გადასასვლელების მოსალოდნელი გადაკეტვის შესახებ ინფორმაცია საქართველოს ხელისუფლებამ საერთაშორისო ორგანიზაციებს მიაწოდა. აღნიშნული საკითხი გალის მოლაპარაკებების ფარგლებშიც განიხილეს.



ფოტოზე: ნაბაკევი-ხურჩის ე.წ. გადასასვლელი







ფოტოზე: ოტობაია-ორსანტიის ე.წ. გადასასვლელი