ე.წ. ციანიდის საქმეზე ბრალდებულის, დეკანოზ გიორგი მამალაძის ადვოკატი პატრიარქის მდივან-რეფერენტის დაკითხვის საეჭვო გარემოებებზე საუბრობს.

როგორც გიორგი ფანცულაიამ ე.წ. მატროსოვის ციხესთან განაცხადა, მისთვის ირონიულია ის ვითარება, როდესაც ჟურნალისტები 24 საათის განმავლობაში მთავარ პროკურატურასთან არიან, როგორ შეიყვანეს საგამოძიებო უწყებაში თეთრუაშვილი ისე, რომ მედიამ ის ვერ შეამჩნია.

„შემიძლია დაგიდასტუროთ, რომ შორენა თეთრუაშვილი დაიკითხა. ამასთან დაკავშირებით ერთი ირონიული კითხვა მექნება - მაშინ როდესაც, თქვენ, ჟურნალისტები, თითქმის 24 საათი მთავარ პროკურატურასთან ხართ და ყველა მნიშვნელოვანი მოწმე გადაიღეთ, საიდან შეიყვანეს შორენა თეთრუაშვილი, საიდან მიიყვანეს, როგორ მოხდა მისი დაკითხვა ისე, რომ ვერც ერთმა ვერ დააფიქსირეთ.

რა სტატუსით სარგებლობს რომ შორენა თეთრუაშვილი? ხომ არ არის ის პატრიარქის მდივან-რეფერენტზე მეტი?“,- განაცხადა ადვოკატმა.

ფანცულაიას თქმით, სასაცილოა ის ფაქტი, რომ მამა გიორგი ბრალდებულია, ხოლო თეთრუაშვილი დაზარალებულის სტატუსით სარგებლობს.

„შორენა თეთრუაშვილი რამდენად მოწმის სტატუსით სარგებლობს? რამდენად რიგითი დაზარალებულია? ასე ვთქვათ, ჩვეულებრივი მდივან-რეფერენტია და არანაირი უფლებებით არ სარგებლობს. ერთი კონკრეტული ფაქტიც მეტყველებს, თუ როგორ ხდება მისი დაკითხვა, როგორ ხდება მისი მისვლა და როგორი გასაიდუმლოებულია ეს ყველაფერი?

დაზარალებული რამდენად არის, ცოტა სასაცილოა, როცა მამა გიორგი ბრალდებულია და შორენა თეთრუაშვილი არის დაზარალებული, თუმცა, პროკურატურას ასე მიაჩნია, ვინაიდან ბრალი მამა გიორგის ედება, შორენას მკვლელობის მომზადებაში, აქედან გამომდინარე, სამართლებრივად მათ ასე განსაზღვრეს.

ჩვენთვის ირონიული მდგომარეობაა, როცა მამა გიორგისთან შევდივარ როგორც პატიმართან და ამ დროს შორენა თეთრუაშვილი სარგებლობს დაზარალებულის სტატუსით“,- განაცხადა ადვოკატმა.

საპატრიარქოს იურისტის, ედიშერ ქარჩავას ინფორმაციით, პატრიარქის მდივან-რეფერენტს შორენა თეთრუაშვილს ე.წ. ციანიდის საქმეზე დაზარალებულის სტატუსი მიენიჭა.

როგორც ქარჩავამ ჟურნალისტებს განუცხადა, თეთრუაშვილი პროკურატურამ რამდენიმე დღის წინ დაკითხა.