მკვლელობის მომზადების ბრალდებით დაკავებულ დეკანოზთან პროკურორების მორიგი შეხვედრა დაგეგმილია. გააგრძელებს თუ არა მამა გიორგი მამალაძე ჩვენების მიცემას, 13 მარტს გაირკვევა.
საგამოძიებო მოქმედებები ე.წ. მატროსოვის ციხეში დილის 10 საათიდან უნდა განახლდეს. მანამდე კი ბრალდებულის ადვოკატები პროკურატურას, ფარული ჩანაწერების ნაწილის გასაჯაროების შემდეგ, საქმეში ბრალდებულის უკვე არსებული ჩვენების გავრცელებასაც სთხოვენ.
დაცვის მხარის პოზიციით, ამით პასუხი გაეცემა კითხვებს, რატომ საუბრობდა ჩანაწერში ბრალდებული შორენა თეთრუაშვილის მარილზე გაშვებაზე და რატომ საუბრობდა ის მრავლობით ფორმაში.
მამა გიორგი მამალაძე ჩვენების მისაცემად მზად არის, თუმცა თვლის, რომ პროკურატურას ფარული ჩანაწერები სრულად უნდა გაევრცელებინა. ბრალდებულს ე.წ. მატროსოვის ციხეში დღეს ადვოკატები შეხვდნენ.