BBC-ის ეთერში ინტერვიუს დროს პროფესორ რობერტ კელის ოთახში შვილები შეუცვივდნენ, რამაც მას მცირე უხერხულობა შეუქმნა, თუმცა ბავშვების გამოჩენამ წამყვანი ძალიან გაამხიარულა. პატარები ერთ დღეში ინტერნეტის ვარსკვლავები გახდნენ და მათ შესახებ მსოფლიოს წამყვანი მედიასაშუალებები წერდნენ.

ბავშვების ბებია ელენ კელი Daylimail-თან ექსკლუზიურ ინტერვიუში ამბობს, რომ ბავშვებს ეგონათ, მამა სკაიპით ბებიას ელაპარაკებოდა და ამიტომ შევიდნენ ოთახში ერთიმეორის მიყოლებით. მისი თქმით, სკაიპის საშუალებით, რობერტსა და მის მეუღლეს ხშირად ესაუბრებიან.

„რობერტი, როგორც წესი, იმ ოთახიდან გვესაუბრება ხოლმე, საიდანაც BBC-ის ერთვებოდა პირდაპირ ეთერში. ალბათ, ბავშვებს ოთახიდან ხმები მოესმათ და ეგონათ, რომ მამა ბებიას ესაუბრებოდა“, - განაცხადა ელენ კელიმ.

ქალი, რომელიც სოციალური ქსელების მომხმარებლების უმრავლესობას ძიძა ეგონა, პროფესორის მეუღლეა - ის იოგას მწვრთნელია. ბავშვების შემდეგ მაყურებლების ყურადღება ოთახში მისმა შესვლამ მიიქცია.

რობერტ კელი პუსანის ეროვნული უნივერსიტეტის პოლიტიკური მეცნიერებების ასოცირებული პროფესორია. ის სამხრეთ კორეაში 2008 წლიდან ცხოვრობს. ჰყავს კორეელი მეუღლე და ორი შვილი - ოთხი წლის მარიონი და ცხრა თვის ჯეიმსი.





პირდაპირ ეთერში მისი მცირეწლოვანი შვილები მაშინ გამოჩნდნენ, როდესაც მამა სამხრეთ კორეის პრეზიდენტის იმპიჩმენტთან დაკავშირებით ძალიან სერიოზულ შეკითხვას პასუხობდა.