„საქართველოში არიან კონკრეტული პოლიტიკური ძალები, რომლებსაც, რა თქმა უნდა, აწყობთ დესტაბილიზაცია, თუმცა ხელისუფლება არის იმისათვის, რათა აღკვეთოს ყოველგვარი ასეთი აქტები საქართველოში. ჩვენ არ დავუშვებთ დესტაბილიზაციას და არ დავუშვებთ არავითარ აქტს, რომელიც ემსახურება ჩვენი ქვეყნის არევას. ამაზე არის პასუხისმგებელი ხელისუფლება ამის ყველა რესურსი აქვს ჩვენს ხელისუფლებას“, - ამის შესახებ განცხადება საქართველოს პარლამენტის თავმჯდომარე ირაკლი კობახიძემ ბათუმში განვითარებული მოვლენების კომენტირებისას გააკეთა.

კითხვაზე, იზიარებს თუ არა მოსაზრებას, რომ საქართველოში არსებობს დესტრუქციული ოპოზიციური ძალა, კობახიძე აცხადებს: „კი ამის მკაფიო ნიშნები ნამდვილად ჩანდა გუშინდელ დღეს, როდესაც ჩვენ ყველა ერთად ვადევნებდით თვალყურს იმ მოვლენებს, რომლებიც განვითარდა ბათუმში და ბათუმის გარშემო“.

მისი თქმით, იყო მკაფიო ნიშნები იმისა, რომ კონკრეტული პოლიტიკური ძალა ცდილობდა ეს ყველაფერი გამოეყენებინა საკუთარი პოლიტიკური მიზნებისთვის.

„იყო კონკრეტული ნიშნები, მკაფიო ნიშნები იმისა, რომ კონკრეტული პოლიტიკური ძალა ცდილობდა ეს ყველაფერი, ეს ვანდალური აქტი გამოეყენებინა საკუთარი პოლიტიკური მიზნებისთვის, სოლილიდარობა გამოუცხადეს ასეთი სახით მოქმედ ადამიანებს. ეს, რა თქმა უნდა, ბადებს კითხვის ნიშნებს. კიდევ ერთხელ - ეს უნდა იყოს გამოძიების საგანი და გამოძიების საფუძველზე უნდა გაირკვეს, თუ ვის რა იურიდიული და ასევე პოლიტიკური პასუხისმგებლობა ეკისრება ამ საქმეში“, - აცხადებს კობახიძე.


მისივე თქმით, პოლიციამ მომიტინგეების მიმართ თანაზომიერი ძალა გამოიყენა.

„ერთია, რას ამბობს ოპოზიცია, თუმცა მეორეა ფაქტი - ჩვენ გვახსოვს, როგორ მოქმედებდა ხელისუფლება წარსულში, როდესაც არაპროპორციული ძალის გამოყენება ხდებოდა მშვიდობიანად მოქმედი ადამიანების მიმართ, დღეს ეს პარადიგმა არის რადიკალურად შეცვლილი. დღეს ვნახეთ, რომ აბსოლუტურად თანაზომიერების პრინციპის სრული დაცვით იმოქმედა ხელისუფლებამ. კონკრეტულად, ასე იმოქმედეს სამართალდამცველმა ორგანოებმა და ეს არის ის ახალი პრაქტიკა და ის ახალი სტანდარტი, რომელიც დამკვიდრდა საქართველოში სწორედ 2012 წლის შემდეგ, მას შემდეგ რაც „ქართული ოცნება“ მოვიდა ხელისუფლებაში“, - განაცხადა კობახიძემ.