„გუშინ რაც მოხდა, ეს იყო ვანდალიზმი და შესაბამისად, ყველა ის პიროვნება, ვინც ჩართული იყო ამ ვანდალიზმში და აშკარად იკვეთება, რომ ეს იყო მართული პროცესი, აუცილებლად კანონის მაქსიმალური სიმკაცრით აგებს პასუხს“, - ამის შესახებ ვიცეპრემიერმა კახი კალაძემ ბათუმში განვითარებული მოვლენების კომენტირებისას განაცხადა.
„არავის მივცემთ უფლებას, რომ თავისი ბინძური ხელები აფათუროს ამ ქალაქში“, - აღნიშნა კალაძემ.
კალაძის განცხადებით, სიტყვისა და გამოხატვის თავისუფლება ქართველი ხალხის ერთ-ერთი მთავარი მონაპოვარია, „თუმცა ეს არ ნიშნავს იმას, რომ გავცდეთ იმ ჩარჩოებს, კანონს და წესრიგს, რაც ამ მიმართულებით არსებობს“.
„რაც შეეხება ორგანიზატორებს, ალბათ, კითხვები უნდა დაუსვათ იმ ადამიანებს, რომლებიც ვანდალიზმს მთელი საღამოს განმავლობაში, მთელი ღამის განმავლობაში სოლიდარობას უცხადებდნენ, აკეთებდნენ განცხადებებს, რომ ქალაქებში, რეგიონებში შეკრებილიყვნენ და სოლიდარობა გამოეცხადებინათ ვანდალიზმისთვის. ეს არის ძალიან მძიმე. რა თქმა უნდა, შესაბამისი სტრუქტურები მუშაობენ ყველა მიმართულებით. გამოძიება დაწყებულია და კიდევ ერთხელ ვიმეორებ, ყველა დამნაშავე კანონის წინაშე მაქსიმალური სიმკაცრით აგებს პასუხს“, - განაცხადა კახი კალაძემ.
ვიცეპრემიერმა მადლობა გადაუხადა სამართალდამცველებს, რომლებმაც, მისი თქმით, შესაბამის ზომებს მიმართეს და ძალას არ გადაამეტეს.