დიდი ბრიტანეთის ხელისუფლებამ ევროკავშირიდან გასვლის შესახებ ოფიციალური განაცხადი, შესაძლოა, ხვალ გააკეთოს.
ხელისუფლება ლორდთა პალატიდან თემთა პალატაში შესწორებებით დაბრუნებულ კანონპროექტზე კენჭისყრას ელოდება.
როგორც ცნობილია, ლორდთა პალატამ ე.წ. ბრექსიტის კანონპროექტში ორი შესწორება შეიტანა. პირველი, გამოყოფის შემდეგ ქვეყანაში მცხოვრები ევროკავშირის მოქალაქეებისთვის დარჩენის უფლების უზრუნველყოფას, მეორე კი ევროკავშირთან შეთანხმების საბოლოო დოკუმენტის პარლამენტში განსახილველად გატანას გულისხმობს.
აღნიშნულ შესწორებებს ხელისუფლება ეწინააღმდეგება და სავარაუდოდ, თემთა პალატა კენჭისყრისას ამ შესწორებებს არ გაითვალისწინებს. შესაბამისად, ლორდთა პალატას კვლავ პირვანდელ ვარიანტს დაუბრუნებს, სადაც მას უცვლელად დაამტკიცებენ და ტერეზა მეის მთავრობას ლისაბონის შეთანხმების 50-ე მუხლის ამოქმედების შესახებ განაცხადის გაკეთების უფლებამოსილება მიენიჭება, რის შემდეგაც უკვე ბრიუსელთან, ევროკავშირიდან გამოყოფის 2 წლიანი პროცედურა დაიწყება.